Santosh Khirvadkar
miT ga.e naqsh sabhi dil ke dikha.un kaise
ek bhula hua qissa main suna.un kaise
ja chuka hai jo sabhi toḌ ke rishte mujh se
sochta huun use avaz laga.un kaise
ahmiyat dil ki yahan log samajhte hi nahin
un ko is baat ka ehsas dila.un kaise
tishnagi us ki bulati hai isharon se mujhe
main samundar ki bhala pyaas bujha.un kaise
pyaar ka koi talabgar nahin duniya men
is ḳhazane ko main ‘santosh’ luTa.un kaise
Leave a Reply