Firaq Gorakhpuri
zer-o-bam se saz-e-ḳhilqat ke jahan banta gaya
ye zamin banti ga.i ye asman banta gaya
dastan-e-jaur-e-behad ḳhuun se likhta raha
qatra qatra ashk-e-gham ka be-karan banta gaya
ishq-e-tanha se huiin abad kitni manzilen
ik musafir karvan-dar-karvan banta gaya
main tire jis gham ko apna janta tha vo bhi to
zeb-e-unvan-e-hadis-e-digaran banta gaya
baat nikle baat se jaise vo tha tera bayan
naam tera dastan-dar-dastan banta gaya
ham ko hai ma.alum sab rudad-e-ilm-o-falsafa
haan har iman-o-yaqin vahm-o-guman banta gaya
main kitab-e-dil men apna hal-e-gham likhta raha
har varaq ik bab-e-tariḳh-e-jahan banta gaya
bas usi ki tarjumani hai mire ash.ar men
jo sukut-e-raz rangin dastan banta gaya
main ne saunpa tha tujhe ik kaam saari umr men
vo bigaḌta hi gaya ai dil kahan banta gaya
vardat-e-dil ko dil hi men jagah dete rahe
har hisab-e-gham hisab-e-dostan banta gaya
meri ghuTTi men paḌi thi ho ke hal urdu zaban
jo bhi main kahta gaya husn-e-bayan banta gaya
vaqt ke hathon yahan kya kya ḳhazane luT ga.e
ek tera gham ki ganj-e-sha.igan banta gaya
sar-zamin-e-hind par aqvam-e-alam ke ‘firaq’
qafile baste ga.e hindostan banta gaya
Leave a Reply