zauq-e-parvaz ki itni to pazira.i kar
par-shikasta huun jo main hausla-afza.i kar
dil-e-ḳhush-fahm ko de phir koi ḳhush-rang fareb
phir kisi rasm se tajdid-e-shanasa.i kar
koi ḳhurshid bhi manzar ka muqaddar kar de
sirf raushan na ye bujhti hui bina.i kar
kaun samjhega tire karb ka mafhum yahan
ghar ki divaron ko ab mahram-e-tanha.i kar
naqd-e-jan chhin magar shisha-e-pindar na toḌ
zaḳhm de mujh ko na ehsan-e-masiha.i kar
kuchh tire tarz-e-amal par bhi to harf aa.ega
mere kirdar ki itni bhi na rusva.i kar
apni rusva.i ko duniya ki nazar se dekhun
is tamashe men kabhi mujh ko tamasha.i kar
yunhi rakh le miri derina rifaqat ka bharam
apni tanha.i men shamil miri tanha.i kar
Leave a Reply