zarra jo zamin ka ho vo aḳhtar nahin hota
bhaTka de jo manzil se vo rahbar nahin hota
masruf hai har shaḳhs so duniya men magan hai
ab ḳhud ko mayassar bhi vo aksar nahin hota
is dil ka na shisha sahe alfaz ke patthar
lafzon se jo zalim koi patthar nahin hota
aadam ki tabi.at ne khila.e hain ajab gul
hona use insan bhi mayassar nahin hota
hain zarf ki taqsim ke qa.em-shuda darje
dariya to kisi taur samundar nahin hota
zalim to hain kuchh aise jinhen laakh paḌha lo
chahat ka sabaq koi bhi azbar nahin hota
sauda na samata jo agar ishq ka ‘shamsa’
yuun pattharon ki zad men to ye sar nahin hota
Leave a Reply