Hasan Rizvi
ab ke yaaro barkha-rut ne manzar kya dikhla.e hain
jalte bujhte chehre hain aur maddham maddham saa.e hain
aaj bhi suraj ke bujhte hi halki gahri shaam hui
aaj bhi ham ne tanha ghar men angare dahka.e hain
kaun kisi ka dukh-sukh banTe kaun kisi ki raah take
charon janib chalte-phirte ḳhud-gharzi ke saa.e hain
un ki yaad men pahron rona apni yahi bas aadat hai
log bhi kaise divane hain hamen hansane aa.e hain
ham pyason ke dil men aag lagane ka hai shauq ‘hasan’
ya phir badal aaj kisi ki zulfen chhune aa.e hain
Leave a Reply