Shahid Jameel
zard patton ke tasavvur se Dari rahti hai
dil ke gulshan men koi sabz pari rahti hai
mausam-e-dard men har peḌ bikhar jaata hai
ek ummid ki vo shaḳh hari rahti hai
vaqt ki dhuup tapish laakh uga le dil par
ek goshe men magar thoḌi tari rahti hai
dil vo patthar hai jo har mauj saha karta hai
gham vo naddi hai jo har vaqt bhari rahti hai
fikr-e-mahbub gham-e-duniya ḳhayal-e-masjud
be-ḳhudi aise masa.il se bari rahti hai
TuTta rahta hai kamre men andhera ‘shahid’
dhuup divar ke us paar dhari rahti hai
Leave a Reply