Murtaza Barlas
zara si baat pe narazgi agar hai yahi
to phir nibhegi kahan dosti agar hai yahi
tumhen dua bhi ham asudgi ki kaise den
jo ham ne dekhi hai asudgi agar hai yahi
hamen bikharna to hai kal nahin to aaj sahi
hamara kya hai tumhari ḳhushi agar hai yahi
abhi na-jane hamen kitne dost khone paḌen
hamari baton men be-saḳhtagi agar hai yahi
main dil men rakhta nahin munh pe saaf kahta huun
kami ye mujh men hai be-shak kami agar hai yahi
jo raah bhaTkun to us ki gali men aa niklun
ḳhusha-nasib miri gumrahi agar hai yahi
misal deni to apni hi zaat ki deni
to phir ghurur hai kya ajizi agar hai yahi
Leave a Reply