zara barish barasti hai shagufe jaag uThte hain
ka.i rangon ki ḳhushbu se dariche jaag uThte hain
abhi tak paanv ki aahaT se ya miTTi shanasa hai
tumhare saath chalti huun to raste jaag uThte hain
kuchh aise raushni dil men utarti hai qarine se
bahut imkan tire va.adon ke sadqe jaag uThte hain
kabhi aise bhi hota hai yunhi baiThe biTha.e hi
miri ankhon men dariyaon ke dhare jaag uThte hain
‘samina’ main to lafzon ko faqat likhti huun kaghaz par
to phir lafzon men ye kaise sharare jaag uThte hain
Leave a Reply