asrarul-haq-majaz

Nanhi Pujaran

ik nannhi munni si pujaran

patli banhen patli gardan

bhor bhae mandir aai hai

aai nahin hai maan laai hai

vaqt se pahle jaag uthi hai

niind abhi ankhon men bhari hai

thodi tak lat aai hui hai

yunhi si lahrai hui hai

ankhon men taron ki chamak hai

mukhde pe chandi ki jhalak hai

kaisi sundar hai kya kahiye

nannhi si ik siita kahiye

dhuup chadhe taara chamka hai

patthar par ik phuul khila hai

chand ka tukda phuul ki Daali

kam-sin sidhi bholi bhali

haath men pital ki thali hai

kaan men chandi ki baali hai

dil men lekin dhyan nahin hai

puuja ka kuchh gyaan nahin hai

kaisi bholi chhat dekh rahi hai

maan badh kar chutki leti hai

chupke chupke hans deti hai

hansna rona us ka mazhab

us ko puuja se kya matlab

khud to aai hai mandir men

man us ka hai gudiya-ghar men

More Poems

Leave a Comment