zamin tashkil de lete falak ta.amir kar lete
ham apne aap men hote to sab taqdir kar lete
inhi rahon pe chalne ki koi tadbir kar lete
agarche ḳhaak uḌti, ḳhaak ko iksir kar lete
nahin tha sar men sauda bam-o-dar ka is qadar varna
zamana dekhta kya kya na ham ta.amir kar lete
ye mohlat bhi baḌi shai thi hamen ai kaash mil jaati
kisi din baiThte kar-e-jahan tahrir kar lete
ḳhalish baaqi na hoti to bhala kya lutf rah jaata
tujhe tasḳhir karna chahte tasḳhir kar lete
nahin guftar ki lazzat ye jazbe ki karamat hai
agar jazba nahin hota to kya taqrir kar lete
mohabbat men junun ki barkaten shamil jo ho jatin
adhure ḳhvab the puuri magar ta.abir kar lete
Leave a Reply