Ghulam Husain Sajid
zamin raushan rahegi asman raushan rahega
miri maujudgi se ye makan raushan rahega
mayassar aa ga.i asudgi jab is nagar ko
chhaton par rang sehnon men dhuan raushan rahega
khulegi ek din sab par haqiqat aa.ine ki
tilism-e-ḳhvab se saara jahan raushan rahega
use mahfuz rakhne ki nikalun koi surat
ki mere ba.ad ye manzar kahan raushan rahega
kisi dil men utarne ki use taklif kyuun den
vo sab ankhon men benam-o-nishan raushan rahega
mujhe kya ilm tha mere muqaddar ka sitara
jahan tum paanv rakkhoge vahan raushan rahega
hamare dam se hai tabindagi is qafile ki
na ham honge na miir karvan raushan rahega
bujha sakta nahin hai koi mere aa.ine ko
andhere men bhi ye ab-e-ravan raushan rahega
khilega niind ke sahra men jo bhi phuul ‘sajid’
vara-e-lazzat-e-vahm-o-guman raushan rahega
Leave a Reply