Agarche Koi Bhi Andha Nahin Tha

Amjad Islam Amjad

agarche koi bhi andha nahin tha

likha divar ka paḌhta nahin tha

kuchh aisi barf thi us ki nazar men

guzarne ke liye rasta nahin tha

tumhi ne kaun si achchha.i ki hai

chalo maana ki main achchha nahin tha

khuli ankhon se saari umr dekha

ik aisa ḳhvab jo apna nahin tha

main us ki anjuman men tha akela

kisi ne bhi mujhe dekha nahin tha

sahar ke vaqt kaise chhoḌ jaata

tumhari yaad thi sapna nahin tha

khaḌi thi raat khiḌki ke sirhane

dariche men vo chand utra nahin tha

dilon men girne vaale ashk chunta

kahin ik jauhari aisa nahin tha

kuchh aisi dhuup thi un ke saron par

ḳhuda jaise gharibon ka nahin tha

abhi harfon men rang aate kahan se

abhi main ne use likkha nahin tha

thi puuri shakl us ki yaad mujh ko

magar main ne use dekha nahin tha

barahna ḳhvab the suraj ke niche

kisi ummid ka parda nahin tha

hai ‘amjad’ aaj tak vo shaḳhs dil men

ki jo us vaqt bhi mera nahin tha