piiri men bhala dhundhiye kya bakht-e-javan ko
ab qat-e-mohabbat hi hui jism se jaan ko
mauquf kar is bazm men ye charb-zabani
ai shama tu katvae hai kyuun apni zaban ko
be-nam-o-nishani hi bada nam-o-nishan hai
kya nam-o-nishan chahiye benam-o-nishan ko
is manzil-e-hasti men thaharta nahin koi
kya jaane ki ye qafila jaata hai kahan ko
insan to hai surat-e-haq kaabe men kya hai
ai shaikh bhala kyuun na karun sajde butan ko
‘joshish’ gul-e-mazmun-e-chaman taba ka tere
dekhe na kabhi ta-ba-abad ru-e-khizan ko
Leave a Reply