zamin-nazhad hain lekin zaman men rahte hain
makan nasib nahin la-makan men rahte hain
vo dol dalen kisi kar-e-paedar ka kya
jo be-sabati-e-umr-e-ravan men rahte hain
ham aise ahl-e-chaman gosha-e-qafas men bhi
hisab-e-khar-o-khas-e-ashiyan men rahte hain
na bud-o-bash ko puchho ki ham faqir-manash
sukhan ke maabad-e-be-saeban men rahte hain
kahan talash karoge hamen ki ham to mudam
huzuri-e-dil-e-be-khanuman men rahte hain
nashe ki lahr men khum khum lundha ke ab-e-hayat
sarab-e-zindagi-e-javedan men rahte hain
nai mohabbaten ‘khalid’ purani dostiyan
azab-e-kashmakash-e-be-aman men rahte hain
Leave a Reply