Ghulam Murtaza Rahi
zamin ke ba.ad ham ab asman na rakkhenge
ḳhala rahega qadam ham jahan na rakkhenge
javab dena paḌega hamen ḳhamoshi ka
so tai kiya hai ki munh men zaban na rakkhenge
kahin izafa kahin hazf to kahin tarmim
kahin ki ab vo miri dastan na rakhenge
tule hain haath jo virse pe saaf karne par
kisi bhi daur ka baaqi nishan na rakkhenge
bata rahe hain ham ehsan jatane valon ko
jo sar pe bojh ho vo sa.eban na rakkhenge
numu ke vaste koshan hain is yaqin ke saath
baḌe hue to ham is ka guman na rakkhenge
agar ho vaj.h-e-ta.alluq to ham se duur raho
koi bhi fasla ham darmiyan na rakkhenge
jab apne ghar men hi apni ana ko ḳhatra hai
ham apne paas ye jins-e-giran na rakkhenge
kisi ne maara hai shab-ḳhun aisa raahi par
ki ab vo sub.h talak tan men jaan na rakkhenge
Leave a Reply