Zamin Chhod Kar Main Kidhar Jaunga

zamin chhod kar main kidhar ja.unga

andheron ke andar utar ja.unga

miri pattiyan saari sukhi huiin

nae mausamon men bikhar ja.unga

agar aa gaya aaina samne

to apne hi chehre se Dar ja.unga

vo ik aankh jo meri apni bhi hai

na aai nazar to kidhar ja.unga

vo ik shakhs avaz dega agar

main khali sadak par thahar ja.unga

palat kar na paaya kisi ko agar

to apni hi aahat se Dar ja.unga

tiri zaat men saans li hai sada

tujhe chhod kar main kidhar ja.unga

Leave a Comment