na koi marhala dushvar hoga
junun jab qafila salar hoga
shafaq ye rang la.egi sahar tak
ki ḳhun-alud har aḳhbar hoga
rahega jo bhi muflis ahd-e-nau men
yaqinan sahab-e-kirdar hoga
ye ghar ko dekh kar main sochta huun
kisi din mujh pe ye ghar baar hoga
tashaddud karne vaale ye bhi sochen
ki ik din sab se istifsar hoga
masa.ib se hi jab fursat na hogi
to kab zikr-e-lab-o-ruḳhsar hoga
na jaage log to ye soch le phir
‘sharar’ jalna tira be-kar hoga
Leave a Reply