zaḳhm ka indimal hote hue
main ne dekha kamal hote hue
hijr ki dhuup kyuun nahin Dhalti
jashn-e-sham-e-visal hote hue
de ga.i mustaqil ḳhalish dil ko
aarzu pa.emal hote hue
log jiite hain jiina chahte hain
zindagani vabal hote hue
kis qadar iḳhtilaf karta hai
vo mira ham-ḳhayal hote hue
pa-e-ilzam aa rukin mujh par
saari ankhen saval hote hue
aaj bhi log ishq karte hain
samne ki misal hote hue
ḳhud se hans kar na mil sake ‘ahmad’
ḳhush-suḳhan ḳhush-ḳhisal hote hue
Leave a Reply