zahrab piine vaale amar ho ke rah ga.e
naisan ke chand qatre guhar ho ke rah ga.e
ahl-e-junun vo kya hue jin ke baghair ham
ahl-e-ḳhirad ke dast-e-nigar ho ke rah ga.e
sahra ga.e to shahr men ik shor mach gaya
jab lauT aa.e shahr-badar ho ke rah ga.e
ummid ke hababon pe ugte rahe mahal
jhonka sa ek aaya khanDar ho ke rah ga.e
rahon pe dauḌte rahe atish ba-zer-pa
manzil mili to ḳhak-basar ho ke rah ga.e
avaragard misl bagulon ke ham rahe
baiThe to gard-e-rahguzar ho ke rah ga.e
baḌhte rahe sarabon pe manind-e-tishnagi
paani mila to ḳhushk shajar ho ke rah ga.e
nazren talash-e-husn men ja pahunchin ta ufuq
jalve tamam hadd-e-nazar ho ke rah ga.e
pabandiyon men the to dikhate the mojaze
azadiyon men shobada-gar ho ke rah ga.e
Dhale ga.e to pattharon se phuuT nikle raag
toḌe ga.e to raqs-e-sharar ho ke rah ga.e
chang o rabab men rahe manind-e-naghmagi
tegh o sinan men siina sipar ho ke rah ga.e
munh jitne utni baten kahi ja rahi hain aaj
yuun mushtahar hue ki ḳhabar ho ke rah ga.e
‘vamiq’ do-dhari tegh hai vo lahja-e-jadid
naghme tamam ḳhuun men tar ho ke rah ga.e
Leave a Reply