Iqbal Azeem
zahr ke ghunT bhi hans hans ke piye jaate hain
ham bahar-hal saliqe se jiye jaate hain
ek din ham bhi bahut yaad kiye ja.enge
chand afsane zamane ko diye jaate hain
ham ko duniya se mohabbat bhi bahut hai lekin
laakh ilzam bhi duniya ko diye jaate hain
bazm-e-aghyar sahi az-rah-e-tanqid sahi
shukr hai ham bhi kahin yaad kiye jaate hain
ham kiye jaate hain taqlid-e-rivayat-e-junun
aur ḳhud chak-e-gireban bhi siye jaate hain
gham ne baḳhshi hai ye mohtat-mizaji ham ko
zaḳhm bhi khate hain aansu bhi piye jaate hain
haal ka Thiik hai ‘iqbal’ na farda ka yaqin
jaane kya baat hai ham phir bhi jiye jaate hain
Leave a Reply