Riyasat Ali Taj
zad-e-rah bhi nahin be-raḳht-e-safar jaate hain
saḳht hairat hai ki ye log kidhar jaate hain
be-ḳhudi men tire divane jidhar jaate hain
manzilen puchhti phirti hain kidhar jaate hain
vaqt paḌ jaa.e to ham sina-sipar jaate hain
naam hi naam nahin kaam bhi kar jaate hain
haa.e kis moḌ pe halat ne pahunchaya hai
aap ham-sa.e se ham saa.e se Dar jaate hain
ohde-daron men bhi ḳhushbu hai hasinon ki si
va.ada kar lete hain aur saaf mukar jaate hain
aap ja sakte nahin chand-sitaron se pare
ham vara-e-had-e-idrak-e-nazar jaate hain
aap ke tanz sar ankhon pe magar yaad rahe
ye vo nashtar hain ke siine men utar jaate hain
jab bhi hota hai kahin tazkira-e-mehr-o-vafa
bhule-bisre hue kuchh naqsh ubhar jaate hain
ilm ke saath saliqa ho to phir kya kahna
rang-e-uslub’ se afkar nikhar jaate hain
aap dekhen ye miri niind se bojhal ankhen
ho chuki raat ijazat ho to ghar jaate hain
zulf kholo to ghani chhanv main kuchh susta len
do-ghaḌi ke liye saa.e men Thahar jaate hain
zaḳhm alfaz ke nasur hua karte hain
baat zaḳhmon ki nahin zaḳhm to bhar jaate hain
ham to varafta-e-ulfat men hamara kya hai
aaj ye raat ga.e aap kidhar jaate hain
kuchh na kuchh hote hain har shahr men fan ke parakh
qadr hoti hai jahan ahl-e-hunar jaate hain
laakh sanjida sahi ‘taj’ hasinon ki ravish
dil uḌa lene ke andaz kidhar jaate hain
Leave a Reply