Nivesh Sahu
yuun to zahmat se likhe jaate hain ham
ḳhair misron men kahan aate hain ham
zehn men chiḳhen rakha karte hain par
us ki ḳhamoshi se ghabrate hai ham
ab karen jhagḌa munasib hi nahin
ishq men buḌhe hue jaate hain ham
hosh men aate hi ho jaate hain chup
aur be-hoshi men chillate hain ham
kis tarah ki vus.aten rakhta hai tu
kis tarah tujh men sama paate hain ham
apne angan men parinde dekh kar
jism ki Tahni se uḌ jaate hain ham
dukh ginati hai vo laḌki ishq men
phir use kuchh der bahlate hain ham
dekhna hai kis kahani ke liye
kaun sa kirdar apnate hain ham
Leave a Reply