Yun to Wo Dard-Ashna Bhi Hain

yuuñ to vo dard-āshnā bhī haiñ

paas rahte hue judā bhī haiñ

jashn-e-āzādgī bapā kiije

kāsa-bardār rahnumā bhī haiñ

hai safīna asīr-e-mauj-e-balā

yuuñ to kahne ko nāḳhudā bhī haiñ

yār-e-be-mehr se gila bhī hai

us se masrūf-e-iltijā bhī haiñ

zindagī par hai iḳhtiyār un kā

bandagān-e-ḳhudā ḳhudā bhī haiñ

us ke dukh-dard meñ sharīk rahe

dil-zada dil kā aasrā bhī haiñ

Leave a Comment