Syed Nawab Haider Naqvi Rahi
yuun to vo dard-ashna bhi hain
paas rahte hue juda bhi hain
jashn-e-azadgi bapa kiije
kasa-bardar rahnuma bhi hain
hai safina asir-e-mauj-e-bala
yuun to kahne ko naḳhuda bhi hain
yar-e-be-mehr se gila bhi hai
us se masruf-e-iltija bhi hain
zindagi par hai iḳhtiyar un ka
bandagan-e-ḳhuda ḳhuda bhi hain
us ke dukh-dard men sharik rahe
dil-zada dil ka aasra bhi hain
Leave a Reply