Poet
yuun ḳhush-guman rakkha gaya umar bhar mujhe
har shaam se mali hai naved-e-sahar mujhe
main tha jo hadd-e-jism se aage na baḌh saka
vo le gaya badan se mire chhin kar mujhe
main zaa.e.a ho chuka huun bahut khel khel men
ai vaqt ab na aur laga daav par mujhe
mere liye qaza hai abhi da.imi hayat
kuchh log chahte hain abhi TuuT kar mujhe
hona hai mo’tabar mujhe apni nigah men
kab e’tibar baḳhshegi teri nazar mujhe
meri tarah ‘nadim’ use hichkiyan na aa.en
jo sochta hai raat kai pichhle pahar mujhe
Leave a Reply