ye zamini bhi hai zamani bhi
fitrat-e-ishq asmani bhi
shart hai jaan se jaiye pahle
hai ajab umr-e-javedani bhi
tum ne jo dastan sunai hai
hai vahi to miri kahani bhi
kitne dilchasp lagne lagte hain
mere qisse tiri zabani bhi
hain zaruri bahut hamare liye
ye faza aag aur paani bhi
ho gai khatm ik kiran ke saath
raat bhi niind bhi kahani bhi
mat inhen janiye dar-o-divar
in men yaden hain kuchh suhani bhi
in divaron pe hi hui tahrir
mere maan baap ki javani bhi
ham jo ghar chhod kar chale aae
the vo ajdad ki nishani bhi
la-makan hi ka zikr-e-khair ‘adil’
go hain qisse bahut makani bhi
Leave a Reply