ye vasl ki vahshat hai ibadat ki ghaḌi hai
naraz farishton ki qasam TuuT rahi hai
ai sho.ala-e-pur-josh tavajjoh main idhar huun
bad-mast idhar dekh jidhar aag lagi hai
sunte hain ḳhuda ruuTh gaya hai nahin sunta
halanki mire shahr ka har shaḳhs vali hai
ai yaar mayassar ka maza le ke juda ho
is mausam-e-gul men tujhe jaane ki paḌi hai
ye aankh jise bojh samajhta hai miyan tu
ye bar-e-hazimat ko uThane ki nafi hai
mujh se mire sayyad ne vahshat se kaha ja
le aaj se tu meri mohabbat se bari hai
har chiiz badal di hai magar kuchh nahin badla
kahne ko chaman-zar ki har shaḳh na.i hai
Leave a Reply