Abdul Wahab Sukhan
ye saneha bhi ajab ho gaya hai raste men
jo rahnuma tha vahi kho gaya hai raste men
kisi bhi abla-pa ko na mil saki taskin
ajiib khaar koi bo gaya hai raste men
itab-e-jan hui gard-e-safar kisi ke liye
kisi ko abr-e-karam dho gaya hai raste men
hudi ki lai karo maddham ai qafile vaalo
thakan se chuur koi so gaya hai raste men
musafiran-e-vafa ki koi khabar na mili
na jaane kaun kidhar ko gaya hai raste men
rahega saath kahan tak ye dekhna hai mujhe
vo ham-sukhan to mira ho gaya hai raste men
Leave a Reply