Ye Rasta

Sameena Raja

in darakhton ke gahre ghane, khvab-alud saae men

khamosh, hairan chalta huaa… ek rasta

kisi duur ki… raushni ki taraf ja raha hai

yahan se jo dekho to jaise… kahin hadd-e-imkan talak

gum-shuda vaqt jaisi andheri gupha hai

yahan se jo dekho… to

ummid jaisa bahut hairat-afza… ajab silsila hai

jo is tang, tarik nuqte se

mumkin ke manind, ik raushni-zad qarye ki janib khula hai

faza men kahin nil-gun sabz, halke sunahre

kahin bas hare hi hare… sakht gahre

bahut unghte dolte rang

sukhe hue surkh patton ke manind

us be-aman raste par pade hain

kiran bhuli-bhatki koi

un se aa kar achanak jo milne lagi hai

to yak-bargi chaunk kar… sab damakne lage hain

andhere ki is hadd-e-imkan talak

tang, gahri gupha men…

sabhi yaad ke jugnuon ki tarah

udte udte chamakne lage hain

yahan se jo dekho… to

nadida manzil ki mauhum hairat se

ankhen, har ik khvab ki niim va hain

tamannaon ke dil dhadakne lage hain!