Rashid Anwar Rashid
ye na socha tha kaḌi dhuup se rishta bhi to hai
sirf dariya hi nahin raah men sahra bhi to hai
dastan-go ki har ik baat tavajjoh se sunun
is hikayat men mire yaar ka qissa bhi to hai
tujh ko chhune ke liye haath baḌha.un to lage
phuul ke saath har ik shaḳh men kanTa bhi to hai
ḳhud hi khinche the hisar us ne magar ab ki baar
mujh se milne vo haden toḌ ke aaya bhi to hai
kashmakash men huun karun tark-e-ta.alluq kaise
us sitamgar pe mire dil ko bharosa bhi to hai
bad-dua ab mire honTon pe machalti hi nahin
isi duniya men miri chhoTi si duniya bhi to hai
Leave a Reply