ye kyā havā meñ uḌe aur paroñ se sher kahe
na.e parind se kah do sukūñ se sher kahe
jab ik ġhazal se na TuuTā vo somnāt-e-badan
to maiñ ne satrah na.e zāviyoñ se sher kahe
har ek shaḳhs pe khultā kahāñ hai bāb-e-atā
aziiz ham ne baḌī minnatoñ se sher kahe
suḳhan buland thā tum se so dekh lo ham ne
tumhāre ba.ad sabhī sar-nigūñ se sher kahe
bujhegī tishna-laboñ kī hamāre sher se pyaas
ye soch kar hī khule pāniyoñ se sher kahe
ḳhabar thī chhāñv ko tarsegā vo kabhī na kabhī
so ‘rāz’ ham ne bahut bargadoñ se sher kahe