Ameer Imam
ye kisi shaḳhs ko khone ki talafi Thahra
mera hona mire hone men izafi Thahra
jurm-e-adam tiri padash thi duniya saari
aḳhirash har koi haq-dar-e-muafi Thahra
ye hai tafsil ki yak-lamha-e-hairat tha koi
muḳhtasar ye ki miri umr ko kaafi Thahra
kuchh ayaan ho na saka tha tiri ankhon jaisa
vo badan ho ke barahna bhi ghilafi Thahra
jab zamin ghuum rahi ho to Thaharna kaisa
koi Thahra to Thaharne ke munafi Thahra
qafiya milte ga.e umr ghazal hoti ga.i
aur chehra tira buniyad-e-qavafi Thahra
Leave a Reply