Arshad Jamal Sarim
ye ḳhaki pairahan ik ism ki bandish men rahta hai
zamana har ghaḌi varna na.i sazish men rahta hai
isi baa.is main apna nisf rakhta huun andhere men
mire atraf bhi suraj koi gardish men rahta hai
main ik parkar sa sayyar bhi huun aur sabit bhi
jahan saara mire qadmon ki paima.ish men rahta hai
miri ankhon men ab hai maujzan bas ret vahshat ki
samundar ab kahan palkon ki har jumbish men rahta hai
supurd-e-ab yuun hi to nahin karta huun ḳhaak apni
ajab miTTi ke ghulne ka maza barish men rahta hai
tasallut hai kisi ka jab se apni zaat par ‘sarim’
hamara dil bahut aram-o-asa.ish men rahta hai
Leave a Reply