Mehboob Rahi
ye karb ka ehsas musalsal mire allah
kar dega kisi din mujhe pagal mire allah
bikhre hue TukḌon ko sameTun bhi kahan tak
kis tarah karun ḳhud ko mukammal mire allah
har zehn jihalat ke andheron ka hai maskan
har haath men hai ilm ki mash.al mire allah
lashon ke har ek shahr men bazar saje hain
har moḌ pe hai ik naya maqtal mire allah
halat se huun barsar-e-paikar abhi tak
go jism men baaqi nahin kas-bal mire allah
milon nahin asar koi dasht-e-yaqin ke
har samt hai tashkik ki daldal mire allah
sarmaya-o-asbab jise chahe use de
‘rahi’ ko bas ik sabr-o-tavakkul mire allah
Leave a Reply