ulfat ho to ulfat ke sahare bhi bahut hain
ankhon men mohabbat ke ishare bhi bahut hain
himmat hai to mayus na ho Dubne vaale
tufan hain maujon ke sahare bhi bahut hain
ai jalva-e-rangin ke ziya dekhne vaalo
hon aankh agar un ke nazare bhi bahut hain
apnon ne to me.ar-e-vafa hi na bataya
is raah men ehsan tumhare bhi bahut hain
ji bhar ke zara dekh to luun duur se gul-rang
saaqi mujhe itne hi sahare bhi bahut hain
us bazm ki ranginiyan hain diid ke qabil
ik chand agar hai to sitare bhi bahut hain
hai kaun ‘safir’ aisa jo ban jaa.e sahara
dil toḌne vaale to hamare bhi bahut hain
Leave a Reply