ye kaisi aag abhi ai sham.a tere dil men baaqi hai
koi parvana jal marne ko kya mahfil men baaqi hai
hazaron uTh ga.e duniya se apni jaan de de kar
magar ik bhiiḌ phir bhi kucha-e-qatil men baaqi hai
hue vo mutma.in kyuun sirf mere dam nikalne par
abhi to ek duniya-e-tamanna dil men baaqi hai
hua tha gharq bahr-e-ishq is andaz se koi
ki naqsha Dubne ka dida-e-sahil men baaqi hai
qaza se koi ye kah de ki mushtaq-e-shahadat huun
abhi ik marne vaala kucha-e-qatil men baaqi hai
kahan fursat hujum-e-ranj-o-gham se ham jo ye janchen
ki nikli kya tamanna kya tamanna dil men baaqi hai
abhi se apna dil thame hue kyuun log baiThe hain
abhi to hashr uThne ko tiri mahfil men baaqi hai
vahan the jam.a jitne marne vaale mar ga.e vo sab
qaza le-de ke bas ab kucha-e-qatil men baaqi hai
abhi se tu ne qatil myaan men talvar kyuun rakh li
abhi to jaan thoḌi si tan-e-‘bismil’ men baaqi hai
Leave a Reply