Zafar Ansari Zafar
ye jo teri ankhon men ma.ani-e-vafa sa hai
kasa-e-tamanna ke harf-e-mudda.a sa hai
mere ḳhuun ki surḳhi surḳhi-e-vafa Thahri
jis se ru-e-qatil bhi surḳh-ru bana sa hai
qatl-gah-e-arman hai jis ki mahfil-e-ishrat
vo nigar-e-fitna-za paikar-e-vafa sa hai
jab se mujh ko hasil hai tere qurb ki daulat
naqsh-e-sang-e-pa.inda mujh pe aa.ina sa hai
lafz aur ma.ani ka ye ta.alluq-e-baham
pesh-e-dida-e-bina rishta-e-vafa sa hai
raḳhsh-e-fikr ko apne kijiye zara mahmez
nau-ba-nau mazamin ka dar abhi khula sa hai
bab-e-shahr-e-irfan ke nur-e-chashm ka hai faiz
parcham-e-jahul-e-vaqt jo jhuka jhuka sa hai
dushmanon ke narghe men main khaḌa huun tanha sa
ma.arka mohabbat ka jang-e-karbala sa hai
honT tere phulon se baat teri ḳhushbu si
ruup chand sa tera dil bhi aa.ina sa hai
parcham-e-mohabbat hai jab se mere hathon men
dard dil-nashin sa hai zaḳhm dil-ruba sa hai
dam men sar uThata hai dam men TuuT jaata hai
dil bhi bahr-e-ulfat men koi bulbula sa hai
shor-e-hashr barpa hai ya ki shor-e-tanha.i
hain bujhi bujhi ankhen dil Dara Dara sa hai
vo nigah-e-janan ka ghamza-e-bala-an.gez
mus.haf-e-mohabbat ke harf-e-ibtida sa hai
mere dil ki ḳhatir to ye fasana-e-hasti
zaḳhm-e-be-rafu sa hai dard-e-la-dava sa hai
bas tiri nigahon men ehtijaj hai batil
har jafa munasib si har sitam rava sa hai
niind kyuun nahin aati ḳhvab ḳhvab ankhon ko
shahr-e-jan men har janib kyuun ye rat-jaga sa hai
chehra-e-mohabbat par hai usi se tabani
ye ghubar pa-e-naz ghaza-e-vafa sa hai
mujh ko mil hi ja.egi ik na ek din manzil
bas isi tavaqqo par dil men hausla sa hai
kaun hai jo rakhta hai dost is qadar mujh ko
ajnabi si duniya men kaun ashna sa hai
ai ‘zafar’ na chhoḌega vo mujhe dua dena
yuun to hai vo barham sa yuun to vo ḳhafa sa hai
Leave a Reply