ye jo kaam rah gae hain unhen rakh ke ja rahi huun
miri zindagi main tujh se bahut thak ke ja rahi huun
yahi dard ke basere yahi hijr ke andhere
ye jo siskiyan hain saari main thapak ke ja rahi huun
faqat ek saans mohlat magar imtihan itne
ye jo talkhiyan thiin teri unhen chakh ke ja rahi huun
miri pyaas ka muqaddar to ye tishnagi hi thahri
gham-e-ishq ki thi chhagal main chhalak ke ja rahi huun
jahan us ne mud ke dekha vahin zindagi ruki thi
ye jo hairaten hain dil ki main jhatak ke ja rahi huun
tiri khushbuon se mahken mire khvab ke jazire
yahi aarzu thi lekin main thapak ke ja rahi huun
tire lams se shanasa nahin ungliyan ye meri
tire hijr ki zamin par main sisak ke ja rahi huun
miri zindagi tu kah de kabhi ja ke charagar se
ki ye khvab ka hai madfan main bilak ke ja rahi huun
kisi aag men jali tu kisi shaam men Dhali main
nahin ruuh to badan men so thithak ke ja rahi huun