teri talash teri tamanna to main bhi huun
jaisa tira ḳhayal hai vaisa to main bhi huun
ta.amir jaisi chahiye vaisi na ho saki
buniyad apni roz uThata to main bhi huun
bosida chhal peḌ se lipTi hai gar to kya
achchhe dinon ki aas pe zinda to main bhi huun
ai zindagi mujhe to ḳhabar tak na ho saki
har-chand apne gham ka mudava to main bhi huun
mahrumi-e-hayat ka mujh ko bhi gham to hai
mahrumi-e-hayat pe rota to main bhi huun
shayad nikal hi aa.e yahan koi rasta
is shahr-e-be-lihaz men Thahra to main bhi huun
ai zindagi to kis liye mayus mujh se hai
teri tavaqquat pe puura to main bhi huun
nok-e-qalam pe surat-e-iz.har ye bhi hai
tujh ko ghazal ke ruup men likhta to main bhi huun
ai zindagi tu thamti mere vajud ko
tere liye jahan men bhaTka to main bhi huun
ai kaash jaan le tu mire dil ki dastan
tum ho to zindagi ka taqaza to main bhi huun
mujh men jo iztirab hai mere sabab se hai
mujh se na kuchh kaho ki samajhta to main bhi huun
ye kya ki ḳhvahishon ka safar ḳhatm hi na ho
ye kya ki ek moḌ pe Thahra to main bhi huun
ye kya ki ek taur se guzregi zindagi
ye kya ki ek raah pe chalta to main bhi huun
rakhta nahin huun dil men havaon ka kuchh bhi ḳhauf
rahon men teri diip jalata to main bhi huun
tum aa.e aur sameT ke duniya nikal ga.e
is umr ke sarab men bhaTka to main bhi huun
main bhi dukhon se mavara kab huun jahan men
bar-e-gham-e-hayat uThata to main bhi huun
main bhi bhaTak raha huun zamane ke saath saath
andha agar jahan hai andha to main bhi huun
tere bayan men hai na mere bayan men
is zindagi ko dekh dikhata to main bhi huun
kuchh raushni ki aas hai mujh ko bhi ai ‘nabil’
ankhon ke diip roz jalata to main bhi huun
hansti hai mujh pe duniya to hansti rahe ‘nabil’
is ke muamlat pe hansta to main bhi huun
ruk se ga.e ‘nabil’ ye kis ke ḳhayal men
tu dekh ghaur se mujhe rukta to main bhi huun
Leave a Reply