Poet
ye hava kaisi chali barham zamana ho gaya
hal-e-dehli bazm-e-alam men fasana ho gaya
dil kisi fard-e-bashar ka ḳhali is gham se nahin
gham ye shaa.e ku-ba-ku ḳhana-ba-ḳhana ho gaya
har sar-e-mizhgan na ho favvara-e-ḳhun kis tarah
gham-zadon ke dil men jab gham ka ḳhazana ho gaya
ek ho to roiye kis kis ko ro.en yaad kar
dekh kar us hadisa ko dil divana ho gaya
dekhte hi dekhte ankhon men aage apne yaan
dam ke dam men aur hi kuchh karḳhana ho gaya
aah gulgun-e-bahar-e-gulshan dehli ko ‘aish’
mauja-e-bad-e-ḳhizan kya taziyana ho gaya
Leave a Reply