Rohit Soni Tabish
ye ehtiyat ishq pe lazim sada rahe
har-chand qurbaten hon magar fasla rahe
hajat nahin ki jam-o-subu mai-kada rahe
dil ka tiri nigah se bas rabta rahe
mah-o-nujum-o-shams ki tham jaa.en gardishen
Thahre tiri nazar to zamana ruka rahe
ma.amur ḳhushbuon se rahe gulshan-e-vajud
bas ik tujhi ko zehn agar sochta rahe
rana.i-e-jamal ka aalam na puchhiye
ik baar dekh le jo use dekhta rahe
fariyad le ke jaa.en bhi ahl-e-chaman kahan
jab baghban ḳhud apna chaman luTta rahe
kuchh der aur ai shab-e-hijran Thahar abhi
kuchh der aur dard ka tufan uTha rahe
Leave a Reply