Shehpar Rasool
ḳhud ko ḳhud par hi jo ifsha kabhi karna paḌ jaa.e
jaise jiine ki bahut chaah men marna paḌ jaa.e
aisa ik vaqt jab aata hai to kya karte ho
dil jo karna nahin chahe vahi karna paḌ jaa.e
ho to mahtab ke ham-raqs magar aisa na ho
daman-e-chashm sitaron hi se bharna paḌ jaa.e
jis ko dekha na kabhi jis ki tamanna bhi na ki
paanv usi shahr ke raste pe jo dharna paḌ jaa.e
surat-e-ashk-e-nadamat hi sahi ai ‘shahpar’
meri ankhon se kabhi us ko guzarna paḌ jaa.e
Leave a Reply