Zafar Iqbal
ye bhi mumkin hai ki ankhen hon tamasha hi na ho
raas aane lage ham ko to ye duniya hi na ho
kahin nikle koi andaza hamara bhi ghalat
jante hain use jaisa kahin vaisa hi na ho
ho kisi tarha se maḳhsus hamare hi liye
yaani jitna nazar aata hai vo utna hi na ho
TakTaki bandh ke main dekh raha huun jis ko
ye bhi ho sakta hai vo samne baiTha hi na ho
vo koi aur ho jo saath kisi aur ke hai
asl men to vo abhi lauT ke aaya hi na ho
ḳhvab-dar-ḳhvab chala karta hai ankhon men jo shaḳhs
DhunDne niklen use aur kahin rahta hi na ho
chamak uTTha ho abhi ru-e-bayaban ik dam
aur ye nazzara kisi aur ne dekha hi na ho
kaifiyat hi koi paani ne badal li ho kahin
ham jise dasht samajhte hain vo dariya hi na ho
mas.ala itna bhi asan nahin hai ki ‘zafar’
apne nazdik jo sidha hai vo ulTa hi na ho
Leave a Reply