ye baat vaqt se pahle kahan samajhte hain
ham ik sara.e ko apna makan samajhte hain
yaqin kisi ko nahin apni be-sabati ka
sab apne aap ko shah-e-zaman samajhte hain
bas ik uḌaan bhari hai abhi ḳhalaon tak
isi ko ahl-e-zamin asman samajhte hain
hamen bhi khinchti hai is kei har kashish lekin
ye ḳhak-dan hai ise ḳhak-dan samajhte hain
ye log itne fasurda isi liye to nahin
ki dusron ko bahut shadman samajhte hain
ḳhuda unhen bhi ho taufiq is ibadat ki
mohabbaton ko jo kar-e-ziyan samajhte hain
Leave a Reply