ye ajab saat-e-rukhsat hai ki dar lagta hai
shahr ka shahr mujhe rakht-e-safar lagta hai
raat ko ghar se nikalte hue dar lagta hai
chand divar pe rakkha hua sar lagta hai
ham ko dil ne nahin halat ne nazdik kiya
dhuup men duur se har shakhs shajar lagta hai
jis pe chalte hue socha tha ki laut aunga
ab vo rasta bhi mujhe shahr-badar lagta hai
mujh se to dil bhi mohabbat men nahin kharch hua
tum to kahte the ki is kaam men ghar lagta hai
vaqt lafzon se banai hui chadar jaisa
odh leta huun to sab khvab hunar lagta hai
is zamane men to itna bhi ghanimat hai miyan
koi bahar se bhi darvesh agar lagta hai
apne shajre ki vo tasdiq karae ja kar
jis ko zanjir pahante hue dar lagta hai
ek muddat se miri maan nahin soi ‘tabish’
main ne ik baar kaha tha mujhe dar lagta hai
Leave a Reply