ah-o-fariyad ka asar dekha
ḳhud ko majbur beshtar dekha
ban gaya hai naqab-e-tang-dili
shohra-e-vus.at-e-nazar dekha
jism ne Daal di sipar jab se
ruuh ko azim-e-safar dekha
hashr ka mo’taqid hua jis ne
manzar-e-matl.a-e-sahar dekha
naav sahil pe lag ga.i aa kar
apne shana pe un ka sar dekha
tama.a pindar jaur hirs fareb
gamzan karvan-e-zar dekha
shub.h-e-zauq-e-nazar na ho jis par
ek aisa bhi dida-var dekha
kar liya un ke ijtinab pe sabr
jab se aghmaz rahbar dekha
dil ka a.ina ru-ba-ru laa.e
is liye un ko ḳhud-nigar dekha
jis ki ek apni ka.enat na ho
‘hamid’ aisa koi bashar dekha
Leave a Reply