yaqin ki saltanat thi aur sultani hamari
damakti thi dua ki lau se peshani hamari
mahakta tha ghane peḌon se virana hamara
jahan-e-ab-o-gil par thi nigahbani hamari
hamare jism ke TukḌe hue raunde ga.e ham
magar zinda rahi ankhon men hairani hamari
ham is ḳhatir tiri tasvir ka hissa nahin the
tire manzar men aa jaa.e na virani hamari
bahut lambe safar ki gard chehron par paḌi thi
kisi ne dasht men surat na pahchani hamari
kisi ne kab bhala jaana hamara karb-e-vahshat
kisi ne kab bhala jaani pareshani hamari
Leave a Reply