hasrat-e-did se mamlu dil-e-shaida.i hai
sharbat-e-did kaf-e-pa ka tamanna.i hai
kaise tufan tamanna ke muqabil Thahre
sho.ala-e-ishq lab-e-gosha-e-tanha.i hai
sho.ala-e-naḳhvat-o-be-zari hasad ujb-o-riya
mane-e-did-e-ruḳh-e-yar tamasha.i hai
kakul-e-sarv-e-chaman misl-e-mah-e-nau dekha
chehra-e-yar men ijad jabin-sa.i hai
har qadam mehr-o-vafa sidq-o-safa har lamha
paikar-e-ishq ko kahte ho ki harja.i hai
kucha-e-ishq-e-tamanna ka pata de mujh ko
teri furqat men mire honTon pe jaan aa.i hai
halqa-e-chashm nasheman hai tiri yadon ka
ḳhirman-e-yad lab-e-gosha-e-tanha.i hai
kaisi duuri hai rag-e-jan se ziyada hai qarin
dil ke chilman ke qarin tu ne jagah paa.i hai
kaun pa.ega saza kaun bari ho.ega
mahfil-e-sham.a men parvanon ki sunva.i hai
ai ‘falak main huun sag-e-ḳhak kaf-e-pa us ka
mash.al-e-rah-e-najat us ki shanasa.i hai
Leave a Reply