Yaqin Hai Ki Guman Hai Mujhe Nahin Malum

Abrar Ahmad

yaqin hai ki guman hai mujhe nahin malum

ye aag hai ki dhuan hai mujhe nahin malum

ye har taraf hai koi mahfil-e-tarab barpa

ki bazm-e-gham-e-zadagan hai mujhe nahin malum

liye to phirta huun ik mausam-e-vajud ko main

bahar hai ki khizan hai mujhe nahin malum

vo rang-e-gul to usi khaak men ghula tha kahin

magar mahak vo kahan hai mujhe nahin malum

khabar to hai ki yahin qarya-e-malal bhi hai

ye kaun mahv-e-fughan hai mujhe nahin malum

main tujh se duur usi dasht-e-na-rasi men huun gum

idhar tu nauha-kunan hai mujhe nahin malum

ye dagh-e-ishq jo mitta bhi hai chamakta bhi hai

ye zakhm hai ki nishan hai mujhe nahin malum

guzarta jaata huun ik arsa-e-gurez se main

ye la-makan ki makan hai mujhe nahin malum

ravan-davan to hai ye ju-e-zindagi har dam

magar kidhar ko ravan hai mujhe nahin malum

ye kashmakash jo man-o-tu ke darmiyan hai so hai

miyan-e-sud-o-ziyan hai mujhe nahin malum

ye ku-e-khak hai ya phir dayar-e-khvab koi

zamin hai ki zaman hai mujhe nahin malum

yahin kahin pe vo khush-ru tha aaj se pahle

magar vo aaj kahan hai mujhe nahin malum