yahi likha hai ki ab main na ma-siva men rahun
safir-e-ḳhak ki surat kahin ḳhala men rahun
sukut ka ye nagar bhi mujhe aziiz rahe
agar main ja ke kisi mahshar-e-nava men rahun
main manzilon ke liye raste men mar ja.un
magar ḳhuda na kare shahar-e-na-rasa men rahun
main dekhta hi rahun hashr tak baqa ke ḳhvab
main hashr tak hi na kyuun panja-e-fana men rahun
purane peḌ bhi hairat se mujh ko dekhte hain
jo un se baḌh ke main sabit-qadam hava men rahun
Leave a Reply