yahan-vahan se idhar-udhar se na jaane kaise kahan se nikle
khushi se jiine ki justuju men hazar gham ek jaan se nikle
ye kamtari bartari ke fitne ye am-o-ala ke sard jhagde
hamin ne naazo se dil men paale hamare hi darmiyan se nikle
khulus ki guftugu to chhodo kisi ko fursat nahin hai khud se
miyan ghanimat samajh lo shikve agar kisi ki zaban se nikle
jo baad muddat mila kahin vo gile yuun ankhon se us ki ubhre
ke jaise patthar sadi purane kisi shikasta makan se nikle
ye shahr-e-gham ki gali gali men jo khvar phirte hain kuchh divane
kabhi hue hain jahan se rusva kabhi tire astan se nikle
Leave a Reply